Bəşər Əsəd 21 təyyarə ilə Moskvaya 2 ton yüzlük dollar göndərib - "Financial Times"
"Suriya hakimiyyəti 2018-2019-cu illərdə Rusiyaya təxminən 250 milyon dollar nağd pul göndərib".
SAVASHMEDİA.az xəbər verir ki, bunu "Financial Times" nəşri yazıb.
Nəşr bildirir ki, Moskvanın "Vnukovo" hava limanına ümumi çəkisi təxminən iki ton olan 100 dollar və 500 avro əskinasları daşıyan təyyarələrin endiyini aşkarlanıb.
Nəşrin məlumatına görə, ümumilikdə, 2018-ci ilin martından 2019-cu ilin sentyabrına qədər Suriyadan Moskvaya nağd pulla yüklənmiş təyyarələrin 21 uçuşu həyata keçirilib.
Materialda deyilir ki, Əsəd və yaxın qohumları elə həmin illərdə Moskvada dəbdəbəli daşınmaz əmlaklar almağa başladılar. Buraya Moskva şəhərinin ərazisindəki yaşayış komplekslərində yerləşən ən azı 19 mənzil daxildir.
Dekabrın 9-da Rusiya prezidentinin mətbuat katibi Dmitri Peskov bəyan edib ki, Rusiya Suriyadan qaçan Bəşər Əsədə sığınacaq verib və o, ailə üzvləri ilə birlikdə Moskvadadır.
"Reuters" isə yazıb ki, Bəşər Əsəd qaçmazdan əvvəl ona yaxın olan şəxsləri Rusiyanın hərbi dəstəyinin yolda olduğuna inandırıb. Sonra isə hətta qohumlarına belə xəbər vermədən gizli şəkildə hava limanına gedib.
Səlcuq
