“Gürcüstan artıq Avropa ailəsinin üzvü deyil” - Metyu Brayza
“Gürcüstan böhran içindədir, Avropa və ABŞ üçün getdikcə daha az maraq kəsb edir”.
SAVASHMEDİA.az gürcü KİV-nə istinadən xəbər verir ki, bunu ABŞ dövlət Departamentinin keçmiş yüksək vəzifəli əməkdaşı Metyu Brayza “Independence Avenue Media” nəşrinə müsahibəsində deyib.
Onun sözlərinə görə, Gürcüstan artıq Avropa ailəsinin üzvü hesab edilmir. “Gürcüstan əvvəlki kimi deyil. O, artıq transatlantik birliyə üzv olmaq istəyən Avropa ölkəsi deyil. O, ilişib qalıb və şübhəsiz ki, Rusiya bunda Tbilisidəki bəzi şəxslərin köməyi ilə iştirak edir. Gürcüstan artıq Cənubi Qafqazın və Orta Dəhlizin ayrılmaz hissəsidir. Lakin o getdikcə Avropa və ABŞ üçün daha az maraqlı olur. O Avropa İttifaqına (Aİ) üzvlük yolu üzrə getmir. Onu artıq transatlantik və hətta Avropa ailəsinin üzvü hesab etmirlər. Onun hökuməti bu assosiasiya üzrə səylərini dayandıracağını bildirib”, - deyə Brayza vurğulayıb.
Amerikalı diplomat qeyd edib ki, Aİ sanksiyaları tətbiq etməklə Gürcüstan hökumətinin dost olmadığını aydın şəkildə çatdırıb: “Düşünürəm ki, Gürcüstan hökuməti də belə düşünür. Gürcüstan vətəndaşlarının Aİ ilə vizasız gediş-gəlişi itirmə ehtimalı da yüksəkdir. Beləliklə, Gürcüstan Avropanın geosiyasi oyunundan tamamilə kəsilib və Rusiyanın orbitinə keçir. Gürcüstan Avropanın geosiyasi oyunundan tamamilə təcrid edilib və... tamamilə Rusiyanın orbitinə düşüb”.
Amerikalı diplomat gürcü liderlərini öz vətəndaşlarına yalan danışmaqda ittiham edib. “Gürcü liderləri “Amerikalılar və avropalılar yeni cəbhə açmağa və Gürcüstanı müharibəyə sürükləməyə çalışırlar” kimi gülünc fikirlər söylədikdə, bu, açıq-aşkar yalan və hökumətin Moskvanın marionetkası olduğunu göstərən anti-Qərb təbliğat elementidir. Heç kim belə hökumətlə iş görmək istəmir. Heç kim. Ona inanmırlar. Belə vəziyyətdə Gürcüstana kim sərmayə qoyacaq? Heç kim. Gürcüstan enişə doğru diyirlənir. Mən bu ölkəni çox sevirəm. Bunu demək mənim üçün çətindir, amma gürcülərin əldə etdiklərinin çoxu dağıdılır. Onları bərpa etmək çox çətin olacaq, dağıtmaq asandır”, - deyə Metyu Brayza təəssüflə vurğulayıb.
Xatirə SADİQ
