Vens İslamabada getməkdən son anda vaz keçdi - SÜLH OLMAYACAQ?

Buna səbəb Vaşinqtonun təqdim etdiyi danışıqlar mövqeyinə Tehrandan hələlik cavab alınmaması göstərilir.

“New York Times” nəşrinin ABŞ rəsmisinə istinadla yaydığı məlumata görə, səfər tam ləğv edilməyib və diplomatik prosesin “istənilən an” bərpa olunması ehtimalı qalır. Eyni zamanda qeyd olunur ki, ABŞ Prezidenti Donald Tramp uzunmüddətli razılaşma əldə olunmadan atəşkəs müddətinin uzadılmasına ehtiyatla yanaşır.

CNN-in məlumatına görə, Cey Di Vens hazırda ABŞ-dədir və çərşənbə axşamı günorta saatlarında Ağ Evdə keçirilən görüşdə iştirak edib.

İran Xarici İşlər Nazirliyinin nümayəndəsi İsmayıl Bəqainin açıqlamasına əsasən, Tehranın İslamabadda ABŞ ilə danışıqlara münasibətdə ehtiyatlı mövqe sərgiləməsi qətiyyətsizliklə deyil, Vaşinqton administrasiyasının ziddiyyətli mesajları və addımları ilə bağlıdır.

Bəzi iddialara görə, ABŞ və İsrailin İrana qarşı hərbi əməliyyatlara başlamasından sonra regionda vəziyyət daha da gərginləşib. Həmin məlumatlarda İranın yüksək rütbəli şəxslər itirdiyi və bunun ardınca müxtəlif region ölkələrində hədəflərə zərbələr endirildiyi bildirilir. Lakin bu məlumatlar müstəqil mənbələr tərəfindən tam təsdiqlənməyib.

2026-cı ilin aprelində əldə olunduğu deyilən iki həftəlik atəşkəsdən sonra tərəflər arasında Pakistanın vasitəçiliyi ilə İslamabadda aparılan danışıqlar da nəticəsiz yekunlaşıb. Mövqelər arasındakı ciddi fərqlər yeni raundun taleyini sual altında saxlayır.

Eyni zamanda Hörmüz boğazı ətrafında vəziyyət də qeyri-müəyyən olaraq qalır. Rəsmi açıqlamalarda zaman-zaman açıldığı bildirilsə də, bölgədə gəmiçiliyin tam bərpa olunmadığı qeyd edilir.

Səlcuq
SAVASHMEDİA.az