Azərbaycanda benzin və dizel maşınları üçün ƏCƏL ZƏNGİ - Kompensasiya veriləcəkmi?
Azərbaycanda benzin və dizellə işləyən avtomobillərin istismardan çıxarılması nəzərdə tutulub.
SAVASHMEDİA.az bu proses necə həyata keçirilə biləcəyi ilə bağlı kiçik araşdırma aparıb.
Maraqlıdır, vətəndaşlara yanacaqla işləyən avtomobillərini elektromobillərlə əvəz etmək üçün güzəştlər təklif oluna bilərmi?
Ondan başlayaq ki, Azərbaycanın uzunmüddətli aşağıkarbonlu inkişaf strategiyasına əsasən, 2035-ci ilədək daxili yanma mühərrikli avtomobillərin istismardan çıxarılması üçün ilkin planlaşdırma aparılması, 2060-cı ilədək isə sərnişin avtomobilləri parkında elektrik və digər alternativ enerji ilə işləyən nəqliyyat vasitələrinin payının 100 faizə çatdırılması nəzərdə tutulur.
Avtomobillər hansı yollarla dövriyyədən çıxarıla bilər?
Dünya təcrübəsində bunun üçün müxtəlif mexanizmlərdən istifadə olunur. Məsələn, dövlət köhnə avtomobilini təhvil verən vətəndaşa yeni avtomobil almaq üçün subsidiya təklif edə, elektromobillərə vergi güzəştləri tətbiq edə və ya müəyyən tarixdən sonra yeni benzin və dizel avtomobillərinin satışını məhdudlaşdıra bilər.
Digər variant iri şəhərlərdə yüksək emissiyalı avtomobillərin hərəkətinə məhdudiyyət qoyulmasıdır. Belə tədbirlər köhnə avtomobillərin istifadəsini tədricən daha az əlverişli edə bilər.
Dünya ölkələri nə edir?
Məsələn, Böyük Britaniya 2030-cu ildən yeni, yalnız benzin və ya dizellə işləyən minik avtomobillərinin satışını dayandırmağı, 2035-ci ildən isə yeni avtomobillərin sıfır emissiyalı olmasını nəzərdə tutur. Bununla belə, hökumət hazırda istifadədə olan benzin və dizel avtomobillərini həmin tarixlərdə qadağan etməyi planlaşdırmır.
Azərbaycanda vətəndaşları nə gözləyir?
Hələlik Azərbaycanda mövcud avtomobillərin məcburi alınması, sahiblərinə kompensasiya ödənilməsi və ya onların istifadəsinə hansı tarixdən məhdudiyyət qoyulması barədə konkret mexanizm açıqlanmayıb.
Ona görə də əsas məsələ avtomobillərin hansı qaydada yenilənəcəyi və bu keçidin vətəndaşlar üçün nə qədər xərc yaradacağıdır. Güzəştlər, kompensasiya və ya məcburi məhdudiyyətlərdən hansının seçiləcəyi gələcək qərarlardan asılı olacaq.
Səlcuq
