Putin BRİKS-də özünün sülh düsturunu təqdim edəcək? - Zelenskidən açıqlama
Ukrayna prezidenti hesab edir ki, Vladimir Putin oktyabrın 22-24-də keçiriləcək BRİKS liderlərinin sammitində müharibəyə son qoymaq üçün öz düsturunu təklif edəcək.
SAVASHMEDİA.az xəbər verir ki, Zelenski bu barədə jurnslitlərə müsahibəsində deyib.
“BRİKS Putinə dünyaya və daxili auditoriyaya Rusiyanın təcriddə olmadığını göstərməkdə kömək edir. Hesab edirəm ki, tərəfdaşlar daha çox çalışmalıdırlar ki, heç də hamı həmin tədbirdə liderlər səviyyəsində təmsil olunmasın. Bu, olduqca vacibdir”, - deyə Ukrayna dövlət başçısı vurğulayıb.
Onun sözlərinə görə, Putin müharibəni bitirməklə bağlı dünyaya öz düsturunu təklif etmək naminə BRİKS-də hər şeyə əl atacaq:
“Və kiminsə onun formulunu dəstəkləməsi və onunla razılaşması üçün hansısa təməl lazımdır. O, başa düşür ki, ABŞ, Avropa yoxdur, Asiya məkanı ilə böyük problemləri var, ərəb ölkələri isə parçalanıb. Ona görə də Putinə alternativ platforma tapmaq lazım idi. BRİKS onun üçün həmin platformadır. Lakin inanıram ki, o, bu platformada iqtisadi əlaqələr qurmayacaq, müharibəni necə bitirmək barədə baxışını ortaya qoyacaq”.
Zelenskinin sözlərinə görə, bu problemli məsələdir, Ağ Evdə də bu məsələ qaldırılıb. O, BMT-nin baş katibi Antonio Quttereşi bu görüşə dəvət etmək üzərində Rusiyanın işləməsini pis siqnal adlandırıb.
Xatirə SADİQ
