Tramp oğlunun Qrenlandiya səfərini şərh etdi
ABŞ-nin seçilmiş prezidenti Donald Tramp oğlunun Danimarkanın Qrenlandiya adasına gözlənilən səfərini şərh edib.
SAVASHMEDİA.az xəbər verir ki, bu barədə amerikalı president “Truth Social” və “X” sosial şəbəkələrində yazıb.
Tramp qeyd edib ki, Qrenlandiya xalqının “MAGA” (“Amerikanı yenidən qüdrətli et” şüarı) tərəfdarı olduğunu eşidib.
“Oğlum kiçik Donald Tramp və bir sıra təmsilçilər ən gözəl yerləri və mənzərələri görmək üçün ora gedəcəklər. Qrenlandiya gözəl yerdir və o, dövlətimizin bir hissəsi olarsa, oradakı insanlar bundan yalnız udacaqlar. Biz onu (adanı – red.) qiymətləndirəcəyik və onu çox pis xarici dünyadan qoruyacağıq. Qrenlandiyanı yenidən qüdrətli edək!”, - deyə Tramp vurğulayıb.
Qeyd edək ki, Qrenlandiyanın xarici işlər naziri bundan öncə Trampın oğlunun adaya gələcəyini və bunun şəxsi səfər olduğunu təsdiqləmişdi.
Tramp ilk prezidentlik dövründən başlayaraq dəfələrlə Qrenlandiyanı “almaq” arzusunu ifadə edib. Lakin onun bu açıqlamaları Danimarka tərəfindən kəskin şəkildə tənqid olunub və adanın “satılmadığı” vurğulanıb.
Bu arada Qrenlandiyanın baş naziri adanın Danimarkadan müstəqil olması uğrunda kampaniyanı gücləndirir.
Xatirə SADİQ
