49 yaşı var, qara maşında olub - Trampa üçüncü sui-qəsdi planlaşdıran Miller kimdir?
Kaliforniyada ABŞ prezidentliyinə namizəd Donald Trampın mitinqinin keçirildiyi yerdən bir qədər kənarda qara avtomobildə silahlı şəxs saxlanılıb.
SAVASHMEDİA.az xarici KİV-ə istinadən xəbər verir ki, bu barədə yerli şerif Çad Byankonun mətbuat xidməti məlumat yayıb.
Hadisə oktyabrın 12-də yerli vaxtla saat 17:00 radələrində baş verib. Həmin şəxs nəzarət-buraxılış məntəqəsində saxlanılıb. Bu şəxs Vam Miller adlı 49 yaşlı Las-Veqas sakini olub.
Onun üzərindən ov tüfəngi və dolu tapança tapıblar. O, qanunsuz silah saxlama ittihamı ilə həbs edilib. Hüquq-mühafizə orqanları hadisənin Trampın və tədbirin digər iştirakçılarının təhlükəsizliyinə heç bir şəkildə təsir etmədiyinə aydınlıq gətirib.
“Mümkündür ki, biz daha bir sui-qəsdin qarşısını almışıq”, - deyə Byanko bildirib.
Şerifin sözlərinə görə, Miller hökumət əleyhinə qrupun üzvüdür. Prezidentliyə namizədin qətlinin qarşısı həmin şəxsin keçid məntəqəsində VİP-lərə saxta vəsiqə təqdim etməsi və dərhal şübhə doğurması səbəbindən alınıb.
Federal Təhlükəsizlik Bürosu hesab etmir ki, insident Trampa sui-qəsd cəhdi ilə bağlıdır. Bu barədə “New York Post” qurumdakı mənbələrə istinadən yazıb.
Xatırladaq ki, seçki kampaniyası dövründə Tramp artıq bir dəfə Batler şəhərində sui-qəsd cəhdinə məruz qalıb, Floridadakı ikinci cəhdin qarşısı təhlükəsizlik agentləri tərəfindən alınıb.
Xatirə SADİQ
