ATƏT Minsk qrupunun buraxıldığını rəsmən elan etdi
ATƏT-in fəaliyyətdə olan sədri Elina Valtonen və ATƏT-in baş katibi Feridun Sinirlioğlu Ermənistan və Azərbaycanın birgə müraciətindən sonra Nazirlər Şurasının Minsk prosesinin ləğvi və əlaqədar strukturların bağlanması barədə qərarının qəbulunu alqışlayırlar.
SAVASHMEDİA.az xəbər verir ki, bu barədə ATƏT-in bəyanatında deyilir.
“Bir daha Ermənistan və Azərbaycana sülh və münasibətlərin normallaşdırılması üzrə tarixi razılaşmaların əldə edilməsinə və onların tezliklə həyata keçirilməsinə davam etmək üçün cəsarətli qərarlarına görə ən səmimi təbriklərimi çatdırmaq istərdim. Onların Birgə Müraciətinə dərhal reaksiya verdim və bu prosesdə məhsuldar əməkdaşlığa görə tərəflərə səmimi təşəkkürümü bildirmək istəyirəm. Mən həmçinin iştirakçı dövlətləri bu konsensusa nail olmaqda əməkdaşlıq ruhuna görə təqdir etmək istərdim”, - deyə Valtonen vurğulayıb.
“Bu, hətta onilliklər boyu davam edən münaqişə və inamsızlıqdan sonra diplomatiyanın nəyə nail ola biləcəyini vurğulayan tarixi hadisədir. Bu, nümayiş etdirir ki, tərəflər ümumi dil tapmağa çalışanda razılaşma mümkündür”, - deyə baş katib Sinirlioğlu bildirib.
ATƏT-in sədri və baş katibi Ermənistana, Azərbaycana və bütövlükdə regiona davamlı sülh və sabitlik gətirəcək səyləri dəstəkləməkdə sarsılmaz sadiqliklərini bir daha təsdiq ediblər.
Bu qərarın qəbulundan sonra ATƏT Minsk prosesini və əlaqədar strukturları başa çatdırmaq üçün addımlar atacaq. Proses 1 dekabr 2025-ci il tarixindən gec olmayaraq tamamlanana qədər, yalnız aktivlərin və avadanlıqların ötürülməsi kimi inzibati funksiyalar davam edəcək.
Qeyd edək ki, Nazirlər Şurasının bu qərarı avqustun 8-də Azərbaycan prezidenti İlham Əliyevin və Ermənistanın baş naziri Nikol Paşinyanın Vaşinqtonda ABŞ prezidenti Donald Trampın iştirakı ilə imzaladığı Birgə Bəyannamədən sonra verilib. Nazirlər Şurasının qərarı ATƏT-ə üzv olan 57 dövlətin hamısının konsensusu ilə qəbul edilib.
Xatirə SADİQ
