G7 Şimali Koreyanı öz qoşunlarını Rusiyadan çıxarmağa çağırdı
G7-nin və üç əsas müttəfiq ölkənin xarici işlər nazirləri Şimali Koreya qoşunlarının Rusiyada yerləşdirilməsindən ciddi narahat olduqlarını və vəziyyətə birgə reaksiya üzərində işlədiklərini bəyan ediblər.
SAVASHMEDİA.az xəbər verir ki, nazirlərin bəyanatı Yaponiya XİN-nin saytında dərc olunub.
Nazirlər bildiriblər ki, bu, Ukraynaya qarşı döyüş meydanında istifadə oluna bilər. Onların fikrincə, KXDR-in birbaşa dəstəyi Rusiyanın itkilərini kompensasiya etmək üçün Moskvanın çıxılmaz səylərini nümayiş etdirməklə yanaşı, münaqişənin təhlükəli şəkildə genişlənməsi deməkdir.
Nazirlər bildiriblər ki, onlar Şimali Koreya ilə Rusiya arasında hərbi əməkdaşlığın artırılmasını, o cümlədən Rusiyanın Şimali Koreyadan ballistik raketləri qeyri-qanuni almasını ən güclü şəkildə pisləyirlər.
Nazirlər KXDR-i işğalçılıq müharibəsində Rusiyaya yardımı dayandırmağa çağırıblar və Ukraynanı dəstəkləməyə sadiq olduqlarını bir daha təsdiqləyiblər.
Qeyd edək ki, bəyanatı G7-nin üzvləri ABŞ, Yaponiya, İtaliya, Böyük Britaniya, Almaniya, Fransa, Kanada və Aİ-dən başqa, Cənubi Koreya, Avstraliya və Yeni Zelandiya imzalayıb.
Xatirə SADİQ
