Kadırovun səhhəti pisləşdi - Ailəsindən narahatdır, Putinlə görüş istəyir

SAVASHMEDİA.az xəbər verir ki, bu barədə “Novaya Qazeta. Europe” nəşrinin araşdırmasında iddia edilib.

“Çeçenistanın rəhbəri, yəqin ki, həkimlərin hökmü ilə barışıb və hakimiyyət dəyişikliyi təşəbbüsünü öz əlinə keçirib. İndi respublikada çeçen liderinin övladlarının və ona sadiq olan, qohumluq əlaqələri ilə hakim ailəyə bağlı olan ən nüfuzlu klanların möhkəmlənməsi sürətlə gedir”, - deyə nəşr qeyd edir.

Bildirilir ki, ötən il Çeçenistanın xəstə rəhbərinin səhhəti bir qədər stabilləşib. İlin sonuna doğru o, özünü tamamilə normal hiss etdi və yanvar ayında ənənəvi olaraq məzuniyyətə çıxdı. Adətən bu zaman o, müntəzəm müayinə üçün Moskvaya Mərkəzi Klinik Xəstəxanaya gedirdi.

Amma bu il Çeçenistan rəhbəri heç yerə getmədi.

Bildirilib ki, Kadırov Qroznıda həyat yoldaşı Medni Kadırova məxsus özəl müasir “Aimed” klinikasına yerləşdirilib.
 
Çeçen hökmdarının səhhətinin pisləşdiyini və xəstəxanaya yerləşdirildiyini gizlətmək üçün Kadırovun PR xidməti xüsusi əməliyyat keçirib. Onlar tez Çeçenistan başçısının Qroznıda tikilən Putinin adına mikrorayonla tanış olması üçün səfər təşkil etdilər. Hər şey o qədər tez edildi ki, Kadırov məsləkdaşları olmadan tikintiyə baxış keçirməyə başladı.

Bundan sonra Çeçenistan rəhbəri “Aimed”ə aparıldı və sosial şəbəkələrdə müxalif çeçen bloqçularının Kadırovun xəstəxanaya yerləşdirilməsi ilə bağlı xəbərlərinin təkzibi kimi mikrorayonun yoxlanılması ilə bağlı süjet yayıldı.

“İki gün sonra çeçen hökmdarı yenidən ictimaiyyət qarşısına çıxdı. Bu dəfə Şimali Qafqaz Universitetinin rektorunun Kabardin-Balkariyada keçirilən dəfn mərasimində. Kadırov pis görünürdü”. 

Nəşr yazır ki, fevralın əvvəlindən Kadırovun həyat tərzi əhəmiyyətli dərəcədə dəyişib. Mənbələrə görə, o, indi “Aimed”də çox vaxt keçirir və həkimlərin nəzarəti altında olmaq üçün hətta klinikada gecələyir. Bundan əlavə, Çeçenistan rəhbəri kortejində əsasən yalnız Qroznıda hərəkət edir, respublika ətrafında və onun hüdudlarından kənarda səfərlər üçün sanitar aviasiyası helikopterindən istifadə edir.

Fevral və martın birinci yarısında Kadırovun iş fəaliyyəti əsasən onun mətbuat xidməti tərəfindən idarə olunan sosial şəbəkələrdə yazıların dərci ilə məhdudlaşıb. Eyni zamanda, o, bütün nümayəndəlik funksiyalarını respublika hökumətinin sədri Maqomed Daudova həvalə edib.

“Novaya qazeta. Europe” vurğulayır ki, son vaxtlar Kadırov respublikanın imici üçün mühüm əhəmiyyət kəsb edən bir sıra tədbirləri buraxıb. Eyni zamanda, o, Qroznının mərkəzində Putin adına mikrorayonun tikintisinin gedişatını dəfələrlə “yoxlayıb”. 

Kadırovun prioritetlərində dramatik dəyişikliyi vurğulayan ən mühüm hadisə onun böyük qızı Ayşatın baş nazirin müavini vəzifəsindən gözlənilmədən istefa verməsi olub. Fevralın sonunda Ayşat Kadırova bildirib ki, bundan sonra o, “bizneslə məşğul olmaqla respublikanın rifahı üçün işləməyə davam edəcək”.

Aişat Kadırovanın istefası ilə eyni vaxtda Kadırovun digər iki qızı Xutmat və Xədicat da dövlət qulluğundan gedib. “Novaya qazeta Europe” qeyd edir ki, çeçen jurnalistlərə bu məlumatı yaymaq qəti qadağan edilib.

Bildirilir ki, əvvəllər nominal sahibləri olan biznes aktivləri Kadırovun qohumlarının adına yenidən rəsmiləşdirilməyə başlayıb.

“Kadırovun qızlarının istefasının əsl səbəbi birbaşa ailə şirkətlərinə nəzarət etmək istəyi ilə bağlıdır. Çeçenistan rəhbərinin özü və onun yetkin övladları məmur olduqlarından (yaxud bu yaxınlara qədər idilər), o zaman dövlət qulluğu haqqında qanuna görə, onların sahibkarlıq fəaliyyəti ilə məşğul olmaq hüququ yoxdur. Yalançı şəxslərdən istifadə hakim ailəyə qanuna rəsmi şəkildə əməl etməyə və eyni zamanda öz biznesinə də tam nəzarət etməyə imkan verirdi. Lakin bu qayda Çeçenistandakı hakim ailənin başçısı sağ olanda işləyir”, - deyə jurnalistlər vurğulyıblar.

Nəşr iddia edir ki, Ramzan Kadırovun bir neçə qadından 14 uşağı var. Lakin onun siyasi planlarında yalnız iki övladı mühüm rol oynayır: 26 yaşlı iş qadını və dövlət qulluqçusu Ayşat və noyabrda 18 yaşı tamam olan Adəm.

Bildirilir ki, Kadırov öz varisi kimi Çeçenistanda “Ramzanın gənc nüsxəsi” adlandırılan Adəmə ümid edir.

“Novaya qazeta. Europe” yazır ki, indi Kadırov hakimiyyət sistemini ailənin təhlükəsizlik qüvvələri və biznes aktivləri üzərində nəzarətini qoruyub saxlayacaq şəkildə yenidən formatlaşdırmaq vəzifəsi ilə üzləşib. Bundan əlavə, o, qohumları üçün Rusiya Federasiyasının rəhbəri Vladimir Putindən şəxsi təminat almalıdır.

Xatirə SADİQ