Keçmiş vəkil Adəm Məmmədov azadlığa buraxıldı
Həbsdə olan keçmiş vəkil Adəm Məmmədov azadlığa buraxılıb.
Bu barədə onun vəkili İmran Ələkbərov məlumat verib.
Adəm Məmmədovun həbs müddəti başa çatdığı üçün o, bu gün 9 saylı Cəzaçəkmə Müəssisəsindən azad edilib.
Xatırladaq ki, Adəm Məmmədov bu il martın 5-də həbs edilib. Bununla bağlı Nərimanov Rayon Məhkəməsi qərar verib.
Adəm Məmmədov vəkil Ceyhun Yusifovun iddiası əsasında Cinayət Məcəlləsinin 147-ci (böhtan) və 148-ci (təhqir) maddələri ilə təqsirli bilinərək 6 ay müddətinə azadlıqdan məhrum edilib.
Bundan başqa, məhkəmə C. Yusifovun müraciəti əsasında A. Məmmədovun qardaşı Xəyyam Məmmədovu 6 ay müddətinə islah işləri cəzasına məhkum edib.
Bakı Apellyasiya Məhkəməsi birinci instansiya məhkəməsinin hökmünü qismən ləğv edərək yeni hökm çıxarıb. Adəm Məmmədova Cinayət Məcəlləsinin 148-ci maddəsi üzrə bəraət verilib. Həmin maddə üzrə təqsirin sübuta yetirilmədiyi qənaətinə gəlib. A.Məmmədov 147.2-ci (Böhtan) maddəsi ilə təqsirli bilinib və barəsində yeni hökm çıxarılıb.
Qeyd edək ki, Vəkillər Kollegiyası Rəyasət Heyətinin 27 yanvar tarixli qərarı ilə Adəm Məmmədovun fəaliyyəti 3 ay müddətinə, vəkil Ceyhun Yusifovun fəaliyyəti isə 27.11.2024 tarixdən 1 illik dayandırılmışdı.
Vəkillər Kollegiyası (VK) Rəyasət Heyətinin ötən ay keçirilən iclasında məhkəmənin qanuni qüvvəyə minmiş hökmünə əsasən, Adəm Məmmədovun vəkillik fəaliyyətinə xitam verilməsi ilə bağlı qərar qəbul olunub.
