Slovakiya XİN-dən Zelenskiyə qəzəbli reaksiya – “Şişirdib…”

SAVASHMNEDİA.az xəbər verir ki, bu barədə Slovakiyanın Xarici İşlər Nazirliyi (XİN) bəyanatla çıxış edib.  

XİN-dən bildirilib ki, Zelenskinin slovakiyalı baş nazirin təhdidinə reaksiyasını “şişirdilmiş” kimi qəbul edirlər. 

“Biz Ukrayna prezidenti Volodimir Zelenskinin spekulyasiya etdiyi “ikinci enerji cəbhəsi”nin açılması ilə bağlı hər hansı əsassız iddiaları, həmçinin Vladimir Putinlə hər hansı ittifaqın qurulması ilə bağlı uydurma ittihamları qətiyyətlə rədd edirik”, - deyə bəyanatda vurğulanıb. 

Slovakiya XİN-i qeyd edib ki, imkanları daxilində Ukraynada həssas və ciddi təsirlərə məruz qalan insanlara humanitar yardım göstəriblər və buna davam edəcəklər. 

Amma “Bundan əlavə, Ukrayna XİN-dəki həmkarları da ölkə ərazisindən nəql olunan Rusiya qazının Ukraynaya ölkə iqtisadiyyatı üçün həlledici əhəmiyyət kəsb edən mühüm gəlirlər gətirdiyini diqqətdən kənara qoymamalıdırlar.

Slovakiya XİN-i vurğulayıb ki, Ukrayna uzunmüddətli hərbi münaqişədə olduğundan “yeni rəqiblər” yaratmaqdan və ya “ikinci cəbhə” ideyasını icad etməkdən çəkinməlidir.

“Slovakiya hökuməti, ilk növbədə, ölkəmizin, vətəndaşlarımızın və Avropa İttifaqının (Aİ) strateji maraqlarını qorumağa borcludur. Ukrayna tərəfinin bunu bəyənib-bəyənməməsindən asılı olmayaraq, buna müvafiq hərəkət edəcək”, - deyə XİN əlavə edib.

Xatırladaq ki, Fitso 2024-cü ildən sonra Rusiya qazının tranzitini davam etdirməkdən imtina etdiyinə görə Ukrayna hakimiyyətini tənqid edib və cavab tədbirlərini nəzərdən keçirəcəyini bildirmişdi. O, belə tədbirlər arasında Ukraynaya elektrik enerjisinin tədarükünün dayandırılmasının mümkünlüyünü vurğulamışdı.

Slovakiya baş nazirinin təhdidinə cavab olaraq Zelenski “görünür, Putin Fitsoya Slovakiya xalqının maraqları bahasına Ukraynaya qarşı ikinci enerji cəbhəsi açmağı tapşırıb” deyə bildirmişdi. 

Xatirə SADİQ