Tramp Putinlə danışdı – “The Washington Post”

SAVASHMEDİA.az xəbər verir ki, bu barədə “The Washington Post” (WP) yazıb.

Bir neçə mənbəyə istinadən qəzet iddia edib ki, Tramp və Putin Ukraynadakı müharibəni müzakirə ediblər. Bu, Trampın qələbəsindən sonra onlar arasında ilk telefon danışığı olub. 

Mənbələrdən biri bildirib ki, Florida kurortundan etdiyi zəng zamanı Tramp rusiyalı həmkarına Ukraynada müharibəni qızışdırmamağı tövsiyə edib və Vaşinqtonun Avropada əhəmiyyətli hərbi mövcudluğunu xatırladıb.

Digər həmsöhbətlərin sözlərinə görə, Putin və Tramp Avropa qitəsində sülhün zərurətindən danışıblar və Tramp Ukraynadakı müharibənin sürətli həllini müzakirə etmək üçün gələcək danışıqlarda maraqlı olduğunu bildirib.

WP-nin iddiasına görə, guya Tramp şəxsi söhbətlərində Rusiyanın ələ keçirdiyi Ukrayna ərazilərinin bir hissəsinin saxlanmasına dair razılaşmanı dəstəkləyəcəyini eyham vurub. “Telefon danışığı zamanı o, ərazilər məsələsinə səthi toxunub”, - deyə bu məslə ilə tanış olan şəxslər vurğulayıblar. 

Nəşr iki mənbəyə istinadən qeyd edir ki, guya Putinə zəng barədə Ukrayna hökuməti məlumatlandırılıb və söhbətin aparılmasına etiraz edilməyib. Nəşrin həmsöhbətlərinin sözlərinə görə, Ukrayna rəsmiləri Trampın Ukraynadakı müharibənin diplomatik yolla həlli ilə bağlı Putinlə qarşılıqlı əlaqədə olacağını çoxdan başa düşürlər.

Materialda qeyd edildiyi kimi, Trampın dünya liderləri ilə ilk zəngləri Dövlət Departamentinin və ABŞ hökumətinin tərcüməçilərinin dəstəyi olmadan baş verir. Trampın keçid komandası hələlik müvafiq xidmətlə standart müqaviləni imzalamayıb. Bu, prezident keçidi üçün standart prosedur hesab edilir.

Ukraynanın kütləvi informasiya vasitələri isə xatırladıb ki, prezident Volodimir Zelenski Amerika vaxtı ilə çərşənbə günü (Ukrayna vaxtı ilə cümə axşamı gecəsi) Donald Trampla telefon danışığı aparıb. Cümə axşamı Tramp deyib ki, prezident seçkilərində qələbəsi elan olunduqdan sonra Putinlə hələ danışmayıb, lakin belə söhbətin olacağını istisna etməyib.

Xatirə SADİQ