Tramp Vatikanda görüş istəyəndə Zelenskinin məsləhətçiləri əsəbiləşib - "Yenə dalaşacaqlar"

SAVASHMEDİA.az xəbər verir ki, bu təfərrüatları “Axios” yazıb. 

Nəşr iddia edir ki, bu “siqnallar”ı alanda Zelenskinin məsləhətçiləri əsəbilik keçiriblər. Onlardan bəziləri Oval kabinetdəki qalmaqaldan sonra Zelenskiyə bunun yaxşı fikir olduğuna əmin olmadıqlarını söyləyiblər.

Mənbələrdən birinin sözlərinə görə, əvvəlcədən heç nə razılaşdırılmayıb.

Güman edilib ki, onlar dəfn mərasimindən sonra görüşməyə cəhd edəcəklər. Lakin Vatikana gələn kimi liderlər bir-biri ilə qarşılaşıblar. Onlar Müqəddəs Pyotr Bazilikasında təkbətək görüşmək üçün yer tapıblar.

Zelenski amerikalı həmkarına deyib ki, Tramp daha çox təzyiq göstərməyincə, Putin yerindən tərpənməyəcək. Tramp cavab verib ki, yəqin ki, Putinə yanaşmasını dəyişməli olacaq.

Zelenski həmçinin təkid edib ki, Tramp Ukraynanın qəbul etdiyi, lakin Rusiyanın rədd etdiyi sülh danışıqlarının başlanğıc nöqtəsi kimi qeyd-şərtsiz atəşkəslə bağlı ilkin təklifinə qayıtsın. Tramp, deyəsən, razılaşıb.

Bundan başqa, Zelenski bir daha Krımı Rusiya ərazisi kimi tanımayacağını təkrar edib və Tramp ondan bunu xahiş etmədiyinə aydın şəkildə eyham vurub. Plan Ukraynanın deyil, ABŞ-nin tanımasını nəzərdə tutur. 

Zelenski Trampa deyib ki, müharibəni bitirmək üçün güzəştə getməkdən qorxmur, lakin bunun üçün ona kifayət qədər etibarlı təhlükəsizlik təminatları lazımdır.

Tramp həmçinin Zelenskinin ABŞ və Ukrayna arasında faydalı qazıntıların tədarükü ilə bağlı müqaviləni mümkün qədər tez imzalamasını təkid edib.

Axios hesab edir ki, Tramp və Zelenski arasında bu görüşün daha müsbət keçməsinin mümkün səbəblərindən biri, ukraynalıların Rusiyanın mövqeyinin tərəfdarları hesab etdiyi vitse-prezident Vens və Ağ Evin xüsusi elçisi Uitkoffun görüşdə iştirak etməməsi olub.

Görüşdən sonra Zelenski hiss edib ki, ilk dəfə Trampın Putinlə bağlı fikrini dəyişməyə nail olub.

Xatirə SADİQ