Zelenski Parisdə Trampa dediyini açıqladı - “Putin yalnız sizdən qorxur”
Ukrayna prezidenti Volodimir Zelenski ABŞ-nin yeni seçilmiş prezidenti Donald Trampla Parisdəki danışıqlarının məğzini açıqlayıb.
SAVASHMEDİA.az xəbər verir ki, bu barədə Zalenski “X” platformasında yazıb.
Bu görüş üçün Fransa prezidentinə və Donald Trampa minnətdarlığını bildirən Zelenski qeyd edib ki, ölkəsində müharibəni bitirmək üçün birlikdə bu məsələnin üzərində işləmək mühümdür.
“Bu, bizim başlıca prioritetimizdir. Parisdə görüşərkən diqqətimizi məhz buna cəmlədik və bu, çox məhsuldar söhbət oldu. Mən bir daha bunu təşkil etdiyinə görə prezident Makrona minnətdarlığımı bildirirəm, həmçinin bu müharibəni ədalətli şəkildə bitirmək üçün güclü əzminə görə prezident Trampa dərin minnətdarlığımı bildirirəm. Bu düzgün yanaşmadır və həqiqətən davamlı sülhü təmin etmək üçün bütün təfərrüatların diqqətlə işlənilməsi vacibdir”, - deyə Ukrayna prezidenti əlavə edib.
Ukrayna prezidenti bir daha xatırladıb ki, Amerika fövəladə nəticələrə – başqalarının əldə edə bilmədiyi şeylərə nail olmaq iqtidarındadır. “Bu müharibəni uğurla başa çatdırmaq üçün bizə Amerikanın, Avropanın və dünyada təhlükəsizliyi qiymətləndirən hər kəsin birliyi, o cümlədən möhkəm mövqelər və sülh təminatı lazımdır”.
Zelenski görüş zamanı Trampa nə dediyinə diqqəti cəlb edib: “Mən prezident Trampa dedim ki, Putin yalnız ondan və bəlkə də Çindən qorxur. Və bu doğrudur. Yalnız qətiyyət bu müharibəni ədalətli sona gətirə və davamlı sülhü təmin edə bilər. Biz zəruri beynəlxalq asayişi bərpa etmək üçün indi hərəkətə keçməliyik”.
Xatirə SADİQ
