Zelenski Şoltsa zəng etdi - "Putinlə nə danışdınız?"
Olaf Şoltsun Rusiya prezidenti Vladimir Putinlə telefon danışıqlarının təfərrüatlarını öyrənmək məqsədilə Ukrayna prezidenti Volodimir Zelenski Almaniya kanslerinə zəng edib.
SAVASHMEDİA.az xəbər verir ki, bu barədə Zelenskinin “X” sosial şəbəkəsindəki səhifəsinə istinadən Ukrayna KİV-ləri məlumat məlumat yayıb.
Ukrayna prezidenti qeyd edib ki, Almaniyanın Ukraynanı dəstəkləməkdə liderliyinə, özəlliklə “Patriot” və “IRIS-T” vasitəsilə hava hücumundan müdafiəni gücləndirdiyinə görə Şoltsa təşəkkür edib.
Zelenski bildirib ki, kanslerlə həm də Ukraynanın özünümüdafiə qabiliyyətini daha da gücləndirə biləcək qətiyyətli birgə addımları müzakirə ediblər.
“Rusiyaya təzyiqin artırılması və Ukraynanın bütün cəbhələrdə mövqelərinin gücləndirilməsi təcavüzkarı real sülhə məcbur etmək üçün çox vacibdir”, - deyə Ukrayna prezidenti vurğulayıb.
Onun sözlərinə görə, kansler Putinlə söhbətinin təfərrüatlarını bölüşüb. Bununla bağlı Zelenski qeyd edib ki, yalnız silah və diplomatiyanın birgə gücü bu müharibəyə məsul olanı dayandırmağa məcbur edə bilər.
“Əsl sülhə yalnız güc yolu ilə nail olmaq mümkündür”, - deyə Zelenski əlavə edib.
Xatirə SADİQ
