“Fransa hərbçilərinin Ukraynada yerləşdirməsini Makronla müzakirə etdik” – Zelenski
Ukrayna prezidenti Volodimir Zelenskinin fransalı həmkarı Emmanuel Makronla telefon danışığı olub.
SAVASHMEDİA.az Ukrayna KİV-nə istinadən xəbər verir ki, bu barədə Zelenski “X” platformasında məlumat paylaşıb.
Ukrayna prezidentinin sözlərinə görə, Makronla döyüş meydanındakı vəziyyəti, xüsusən də Ukrayna qüvvələrinin Kursk əməliyyatındakı uğurlarını müzakirə edib və effektiv təhlükəsizlik təminatları hazırlamaq üçün müttəfiqlərlə əməkdaşlığa razılaşıb.
“Belə təminatlardan biri kimi biz Fransanın Ukraynada hərbi kontingentlərin yerləşdirilməsi təşəbbüsünü müzakirə etdik. Biz onun həyata keçirilməsi, mümkün genişləndirilməsi və bu prosesə digər ölkələrin cəlb edilməsi üçün əməli addımları nəzərdən keçirdik”, - deyə Zelenski əlavə edib.
Ukrayna lideri dekabrda bildirmişdi ki, Brüsseldə keçirilən görüşlərdə Rusiyanın yeni hücumuna qarşı təminatlardan biri kimi Ukraynada sülhməramlı missiya yerləşdirmək ideyası müzakirə olunub və artıq bəzi liderlərdən pozitiv münasibət görür.
Xatirə SADİQ
