Qrenlandiyanın alınması haqqında qanun layihəsi Konqresə təqdim olundu – “Fox News”
ABŞ Konqresinin Nümayəndələr Palatasının bir qrup respublikaçı üzvü Qrenlandiyanı almaq üçün Donald Trampa qanuni səlahiyyət verəcək qanun layihəsi hazırlayıb.
SAVASHMEDİA.az bu barədə “Fox News” telekanalına istinadən xəbər verir.
Tennessi ştatından respublikaçı konqresmen Endi Oqls “Fox News”a müsahibəsində bildirib ki, 10 partiya üzvü ilə birlikdə “Qrenlandiyanı Yenidən Qüdrətli Et Aktı” (“Make Greenland Great Again Act”) adlı qanun layihəsini Nümayəndələr Palatasına təklif edib.
Qanun layihəsində nəzərdə tutulur ki, ABŞ prezidenti andiçmə mərasimindən dərhal sonra Qrenlandiyanın alınması barədə Danimarka ilə danışıqlara başlaya və saziş bağladıqdan sonra bu barədə Konqresə xəbər edə biləcək.
“Amerikanın iqtisadi və təhlükəsizlik maraqları artıq arxa planda qalmayacaq və Nümayəndələr Palatasının respublikaçıları Amerika xalqı maraqları baxımından Trampa uğur qazanmağa kömək etməyə hazırdırlar”, - deyə Oqls əlavə edib.
Yanvarın 20-də vəzifəsinin icrasına başlayacaq Tramp ötən həftə strateji əhəmiyyətli və minerallarla zəngin Arktika adasını almaq fikrini yenidən gündəmə gətirib.
Xatirə SADİQ
