Lukaşenko ilə münasibətlərin bərpası Putinə görə olub - Kelloq
ABŞ prezidentinin Ukrayna üzrə xüsusi elçisi general Kit Kelloq ölkəsinin Belarus prezidenti Aleksandr Lukaşenko ilə münasibətləri bərpa etməsinin səbəbinə aydınlıq gətirib.
SAVASHMEDİA.az “Новини. Live” nəşrinə istinadən xəbər verir ki, Kelloq bu barədə Varşava Təhlükəsizlik Forumu zamanı danışıb.
Ağ Evin xüsusi elçisinin sözlərinə görə, səbəb siyasi məhbusların azad edilməsi ilə yanaşı, Putinlə ünsiyyət kanalı yaratmaqdır.
Kelloq qeyd edib ki, bu, Rusiya və Ukrayna arasındakı müharibədə sülhə nail olmaq yollarını tapmaq, eləcə də Moskvaya bütün siqnalların və mesajların razılaşdırılmış və ardıcıl olmasını təmin edən geniş strategiya olub.
Trampın xüsusi elçisi Bayden administrasiyasını Putinə zəng etmədiyi üçün tənqid edib. O, diqqətə çatdırıb ki, “diplomatiya hətta düşmənlərlə də birbaşa əlaqə tələb edir”.
Belarusun “Belavia” aviaşirkətinə qarşı sanksiyaların ləğvinə gəlincə, Kelloqun fikrincə, “onların təyyarələrinin düşməməsi arzuolunandır”. O, əlavə edib ki, ölkəsi Belarusa sadə bir mesaj verib: təyyarələri təmir edin və qanuni ehtiyat hissələrindən istifadə edin və bu, sanksiyalar üçün əsasları aradan qaldıracaq.
Lakin bu, yalnız təyyarələrin qanuni istifadəsinə aiddir. Təyyarə qeyri-qanuni əməliyyatlar üçün istifadə olunarsa (məsələn, sonradan sərhəd pozuntuları ilə miqrantların kütləvi daşınması və ya digər qeyri-qanuni fəaliyyətlər), heç bir yumşalma olmayacaq.
Xatirə SADİQ
