Rusiyalı deputat Harrisə “qudurub” dedi – Qəzəbin səbəbi
ABŞ-nin vitse-prezidenti Kamala Harris amerikalı jurnalist Bob Vudvortun “Müharibə” kitabında yer alan məlumatlara görə respublikaçı rəqibi Donald Trampı sərt tənqid edib.
SAVASHMEDİA.az xarici KİV-ə istinadən xəbər verir ki, vitse-prezident Rusiya prezidentini də yaddan çıxarmayıb və Putini “qatil diktator” adlandırıb.
ABŞ prezidentliyinə namizədin bu sözləri Rusiyada öz liderlərinin təhqir olunması kimi qiymətləndirilib.
Dövlət Dumasının Beynəlxalq Əlaqələr Komitəsinin sədrinin birinci müavini Aleksey Çepa yerli KİV-ə müsahibəsində bildirib ki, Rusiya prezidentinin ünvanına söylədiyi təhqirlər Kamala Harrisin intellektindən, psixi və sağlamlıq durumundan xəbər verir.
“Bugünkü Qərb siyasi elitası onları narahat edən uğursuzluqlardan hiddətlənir. Onlar bütün dünyaya diktə etməyə öyrəşmişdilər və dünya onlara qulaq asmağı dayandırdıqda ayaqlarının altından torpaq qaçdı”, - deyə Çepa vurğulayıb.
Deputatın sözlərinə görə, prezidentini ünvanına deyilən sözlər məsuliyyətsizlik və ədəbsizlikdir: “Bu əlacsızlıqdan xəbər verir. İnsan əsəbi olanda, qışqıranda, quduranda, söyüş söyəndə bu, onda hər şeyin normal olmadığını göstərir”.
Qeyd edək ki, oktyabrın 15-də ABŞ-də jurnalist Bob Vudvordun Müharibə” kitabı nəşr olunacaq. Nəşrə qədər Amerika ictimaiyyətinə məlum olub ki, kitabda Donald Trampın ABŞ prezidenti vəzifəsindən getdikdən sonra Rusiya prezidenti Vladimir Putinlə 7 dəfə telefon danışığı olduğu barədə məlumat yer alıb. Jurnalist iddia edib ki, Tramp Floridadakı Mar-a-Laqo malikanəsində Rusiya prezidenti Vladimir ilə telefonda danışa bilsin deyə böyük köməkçisindən otağı tərk etməyi tələb edib.
Seçkiqabağı kampaniya dövründə bu xəbər ABŞ-də böyük rezonans doğurub.
Xatirə SADİQ
