Şimali Koreyanın 300 əsgəri öldürülüb – Cənubi Koreya kəşfiyyatı
Ukraynaya qarşı müharibədə, ən azı, 300 Şimali Koreya əsgəri həlak olub, daha 2700 əsgər yaralanıb.
SAVASHMEDİA.az xəbər verir ki, bu barədə Cənubi Koreya kəşfiyyatına istinadən “Yonhap” agentliyi məlumat yayıb.
“Xalq Hakimiyyəti” hakim partiyasının nümayəndəsi Li Sonq-Kvenin sözlərinə görə, Cənubi Koreyanın Milli Kəşfiyyat Xidməti (MKX) bu məlumatı parlamentin kəşfiyyat komitəsinin qapalı iclasında qanunvericilərlə paylaşıb.
MKX döyüş hərəkətləri ilə bağlı yeni əldə edilmiş video-görüntüləri təhlil edib və qeyd edib ki, Moskvanın Ukraynadakı müharibəsini dəstəkləmək üçün göndərilən Şimali Koreya əsgərlərinin kütləvi itkiləri onların müasir müharibəni anlamaması, o cümlədən dronlara “faydasız” atəş açması ilə bağlıdır.
Kəşfiyyat həmçinin bildirib ki, Şimali Koreya öz əsgərlərini Ukrayna hərbçiləri tərəfindən əsir düşməmək üçün özlərini öldürməyə məcbur edir.
MKX-nin məlumatına görə, Rusiyanın Kursk vilayətində Ukrayna qüvvələri tərəfindən əsir götürülən iki Şimali Koreya əsgəri Şimali Koreyanın Baş Kəşfiyyat İdarəsində xidmət edib.
Xatirə SADİQ
