Tramp işləyəcəyi şəxslərin adlarını açıqladı
ABŞ-nin yeni seçilmiş prezidenti Donald Tramp gələcək administrasiyasının bəzi yeni fiqurlarının adlarını açıqlayıb.
SAVASHMEDİA.az xəbər verir ki, bu barədə “Amerikanın səsi” məlumat yayıb.
Donald Tramp keçmiş İmmiqrasiya və Gömrük Mühafizəsi (ICE) direktoru Tom Homanı sərhəd “çarı” təyin etmək niyyətindədir və qeyri-qanuni immiqrantları deportasiya etmək üçün ona geniş səlahiyyətlər verir.
Bundan başqa, Tramp Nümayəndələr Palatasının Nyu-Yorkdan olan nümayəndəsi Eliz Stefanikin namizədliyini ABŞ-nin BMT-dəki səfiri vəzifəsinə irəli sürmək niyyətindədir.
“Keçmiş ICE direktoru və sərhəd nəzarətinin gücləndirilməsinin möhkəm tərəfdarı Tom Homanın Tramp administrasiyasına qoşulacağını və ölkəmizin sərhədlərindəki işlərə görə cavab verəcəyini elan etməkdən şadam”, - deyə o, “Truth Social”da bildirib.
“Amerikanın səsi” qeyd edib ki, Trampın ABŞ tarixində ən böyük deportasiya əməliyyatını həyata keçirəcəyi ilə bağlı vədinin həyata keçirilməsində Homanın əsas rol oynayacağı gözlənilir. Tramp bildirib ki, onun səlahiyyətlərinə cənub və şimal sərhədlərinə nəzarət, dəniz və aviasiya təhlükəsizliyini təmin etmək və qeyri-qanuni mühacirlərin mənşə ölkələrinə deportasiyasını istiqamətləndirmək daxildir. Belə rol Senatın təsdiqini tələb etmir.
Xatirə SADİQ
