“Ukraynaya dəstəyi dayandırsaq, Putin qalib gələcək” – Jozep Borrell
“Əgər biz Ukraynaya dəstəyi dayandırsaq, 15 gündən sonra müharibə bitəcək və Putin öz məqsədlərinə çatacaq. Amma biz bunu ukraynalılar və özümüzün, avropalıların təhlükəsizliyi üçün istəyirikmi?”
SAVASHMEDİA.az xəbər verir ki, bunu Avropa diplomatiyasının rəhbəri Josep Borrell “20 minutos” nəşrinə deyib.
Onun sözlərinə görə, insanların əksəriyyəti Rusiya və Ukrayna arasında hərbi münaqişənin mümkün qədər tez bitməsini istəyir, lakin əsas məsələ bunun necə baş verəcəyidir.
Borrell hesab edir ki, Qərb dövlətləri gələcək danışıqların Ukraynanın suverenliyi və ərazi bütövlüyünə əlverişli şəraitdə baş tutması üçün hər şeyi etməlidir.
Xatırladaq ki, Ukrayna prezidenti Volodimir Zelenski Qərbin köməyinin dayandırılmasının əleyhinədir. O, bildirmişdi ki, Qərb tərəfdaşlarının köməyi olmadan ölkəsi insanları və ərazilərini itirəcək.
Avqustun sonunda Borrel deyirdi ki, Avropa İttifaqının Kiyevə hərbi yardımı 43,5 milyard avroya çatıb.
Xatirə SADİQ
