“Bu məsələyə kifayət qədər reaksiya vermirlər” – Ukrayna prezidenti
“Dünya liderləri Rusiyanın Şimali Koreya ordusunun Ukraynaya qarşı hərbi əməliyyatlara cəlb olunmasına kifayət qədər reaksiya vermirlər”.
SAVASHMEDİA.az Ukrayna KİV-nə istinadən xəbər verir ki, bunu İslandiyada səfərdə olan prezident Volodimir Zelenski jurnalistlərlə söhbətində bildirib.
“Hesab edirəm ki, ABŞ, NATO, Qərb tərəfdaşları, Qlobal Cənub və Çinin səsi Şimali Koreya kontingentinin Rusiya ərazisində mövcudluğu ilə bağlı lazım olduğu qədər yüksək səslənmir”, - deyə o, vurğulayıb.
Zelenskinin sözlərinə görə, bu, çox təhlükəlidir və müharibənin yeni səhifəsini açır.
Ukrayna prezidenti indiki zəif reaksiyanı Rusiyanın Krımı işğal etdiyi dövrlə müqayisə edib: “O zaman Qərbdə sükut idi. Heç kim reaksiya vermək istəmirdi. Səbəbini bilmirəm, amma hamı gərginləşmədən qorxurdu. Və Putin bir dəfə Krımla dadına baxdıqdan sonra başa düşdü ki, davam etmək olar. Və Donbassla cəhd etdi və uğur qazandı. Donbass işğal edildi”.
Zelenski qeyd edib ki, Rusiyanın Şimali Koreyadan hərbçiləri cəlb etməsinə təsirli reaksiya lazımdır.
Xatirə SADİQ
