“Dojd” telekanalına yayım lisenziyası bərpa olundu – Latviyada
Riqa rayon İnzibati Məhkəməsi “Dojd” telekanalının yayım lisenziyasının ləğvi haqqında Latviya Milli Elektron Kütləvi İnformasiya Vasitələri Şurasının (NEPLP) barədə qərarını ləğv edib.
SAVASHMEDİA.az “The Moscow Times” nəşrinə istinadən xəbər verir ki, bunu tənzimləyicinin rəhbəri İvars Abolinş bildirib.
Onun sözlərinə görə, NEPLP bu qərardan apellyasiya şikayəti vermək niyyətindədir. Abolinş həmçinin söz verib ki, “Dojd” bundan sonra da Latviyaya qayıtmayacaq.
Telekanalın baş redaktoru Tixon Dzyadko məhkəmənin qərarını “yaxşı xəbər” adlandırıb. “Bu, gözəldir: iki ildən sonra ədalət bərpa olundu”, - deyə Dzyadko öz Telegram kanalında yazıb. Baş redaktor məhkəmənin qərarının “Dojd”un Latviya və digər Baltikyanı ölkələrdə kabel şəbəkələrinə qayıtmasının başlanğıcı olacağına ümid etdiyini bildirib.
Ukraynaya qarşı genişmiqyaslı müharibəyə başlayandan sonra Rusiya Baş Prokurorluğu “Dojd” saytına girişin məhdudlaşdırılmasını tələb edib. 2022-ci il martın əvvəlində telekanal Rusiya silahlı qüvvələri haqqında “saxta xəbərlər” haqqında qanunun qəbulu ilə əlaqədar Rusiyada fəaliyyətini dayandırıb.
Lakin bundan sonra “Dojd” Latviyada yayım lisenziyası alaraq 2022-ci ilin yayında fəaliyyətini bərpa etdi. Sonrakı aylarda NEPLP kanalı Rusiya silahlı qüvvələri haqqında “bizim ordumuz” ifadəsinə görə və efirdə Rusiyanın xəritəsini işğal olunmuş Krımla birlikdə nümayiş etdirdiyinə görə 10 min avro cərimələdi.
Lakin 2022-ci ilin dekabrında aparıcı Aleksey Korostelev efirdən söylədi ki, səfərbərlikdən sonra kanal bir çox rus əsgərinə, o cümlədən “cəbhədəki əsas şərait” və texnika ilə “kömək edə bildi”. Bu, artıq üçüncü pozuntu hesab olunduğundan NEPLP 2022-ci il dekabrın 6-da “Dojd”un yayım lisenziyasını ləğv etdi. Korostelev sözlərinin kontekstdən çıxarıldığını iddia etsə də, bu hadisədən sonra “Dojd” jurnalistin işdən çıxarıldığını elan etdi. Latviya hakimiyyəti isə həmin jurnalistin ölkəyə girişinə qadağa qoydu.
2022-ci il dekabrın sonunda “Dojd” Niderlandda lisenziya aldı və bu, onun bütün Avropa İttifaqında, o cümlədən Latviyada yayımlanmasına icazə verir. Telekanal öz redaksiyasını Amsterdama köçürüb və indi də orada fəaliyyət göstərir. 2023-cü ilin iyulunda Rusiya Baş Prokurorluğu kanalın “Latviya və Niderland filiallarını” “arzuolunmaz təşkilatlar” elan edib.
Xatirə SADİQ
