"Ətağa sənin atandan yaxşı kişidir" - Bakıda sonu faciə ilə bitən söhbət
Bakıxanov qəsəbəsindəki çörək zavodunda iş yoldaşını qətlə yetirməkdə təqsirləndirilən Elşən Məmmədovun cinayət işinin məhkəmə istintaqı yekunlaşıb.
Bakı Ağır Cinayətlər Məhkəməsinin hakimi Cavid Hüseynovun sədrliyi ilə keçirilən prosesdə dövlət ittihamçısı çıxış edərək təqsirləndirilən Elşən Məmmədovun 18 il azadlıqdan məhrum edilməsini istəyib.
Müşavirədən sonra hakim hökmü elan edərək, Elşən Məmmədovun 17 il müddətinə azadlıqdan məhrum ediləcəyini bildirib.
Qeyd edək ki, hadisə 2024-cü ilin aprelində paytaxtın Sabunçu rayonunda qeydə alınıb. Bakıxanov qəsəbəsində Elşən Məmmədov işlədiyi "Bakıxanov" çörək zavodunda iş yoldaşı, 1990-cı il təvəllüdlü Etibar Salamzadə ilə mübahisə edib. Daha sonra hər ikisi zavoddan çıxaraq küçədə əlbəyaxa olub.
Elşən Məmmədov Etibar Salamzadəyə bıçaq zərbələri endirib. Yaralı xəstəxanaya aparılarkən yolda dünyasını dəyişib.
Onu da qeyd edək ki, tərəflər arasındakı mübahisəyə səbəb Elşən Məmmədovun Etibar Salamzadəyə "Ətağa sənin atandan yaxşıdır" deməsi olub. Daha sonra Etibar Salamzadə Elşən Məmmədovun atasını təhqir edib. Bununla tərəflər arasında sonu ölümlə nəticələnən mübahisə baş verib.
Elşən Məmmədov hüquq-mühafizə orqanlarının əməkdaşları tərəfindən şübhəli şəxs qismində saxlanılıb. Ona qarşı Cinayət Məcəlləsinin 120.2.2-ci (xuliqanlıq niyyəti ilə qəsdən adamöldürmə) maddəsi ilə ittiham irəli sürülüb. (oxu)
