“Mən yaxınlaşıb tanış oldum” – Emin Ağalarov ondan danışdı
Tanınmış biznesmen, müğənni, Azərbaycanın Xalq artisti Emin Ağalarov yayda Azərbaycana gələn “Telegram”ın təsisçisi Pavel Durovla şəxsən görüşdüyünü bildirib.
SAVASHMEDİA.az Rusiya KİV-nə istinadən xəbər verir ki, Emin Ağalarov bu barədə rusiyalı jurnalist Kseniya Sobçaka müsahibəsində danışıb.
Ağalarovun sözlərinə görə, Durov məhz müğənninin Bakıda sahibi olduğu “Sea Breeze Resort & Residences”də bir neçə gün istirahət edib.
E.Ağalarov qeyd edib ki, Durovu yalnız bir gün “Sea Breeze”in ərazisində görüb, çünki qalan vaxtlar “Teleqram”ın yiyəsi kurort ərazisində olmayıb.
“Mən yaxınlaşıb tanış oldum”, - deyə Ağalarov vurğulayıb.
O, əlavə edib ki, Durov kurortda olarkən, onun asudə vaxtla bağlı cədvəlini izləməyib: “Restoranlarda nahar, şam etdi, sakit vaxt keçirdi”.
Emin Ağalarov əlavə edib ki, “Telegram”ın təsisçisi həyat yoldaşı Yuliya Vavilova ilə Azərbaycanda olub, bütün ölkəni gəzə bilib, hətta Qarabağda da olub.
Azərbaycan prezidenti İlham Əliyevin “Telegram”ın təsisçisini qəbul edib-etmədiyi ilə bağlı Sobçakın sualına cavabında Ağalarov bildirib ki, o, belə bir məlumata malik deyil.
Qeyd edək ki, məhz Azərbaycandan qayıdarkən Durovu Paris hava limanında saxlamışdılar. Onun Azərbaycana gəlişi Rusiya prezidenti Vladimir Putinin ölkəmizə səfəri ilə eyni vaxta təsadüf etmişdi. Bir sıra teleqram kanalları yazırdılar ki, guya Putin Bakıda Durovla da görüşüb. Lakin Kreml bu xəbəri təkzib etmişdi.
Xatirə SADİQ
