“Sən Putinə necə zəng edə bilərsən?” – Almaniya kansleri tənqid olundu 

SAVASHMEDİA.az xəbər verir ki, bu barədə “Amerikanın səsi” məlumat yayıb. 

Polşa prezidenti Andjey Duda bazar ertəsi jurnalistlərə bildirib ki, ABŞ-nin Ukraynaya Rusiya ərazisinə dərin zərbələr endirmək üçün ABŞ istehsalı silahlardan istifadə etməyə icazə verməsi müharibədə həlledici rol oynaya bilər.

“Bu qərar tamamilə zəruri idi. Rusiya görür ki, Ukrayna güclü dəstəyə malikdir, Qərbin mövqeyi isə sarsılmaz və qətidir. Bu, indiki müharibədə çox vacib, potensial həlledici məqamdır”, - deyə Duda əlavə edib.

Duda rəsmi Berlini Almaniyanın ABŞ ilə siyasətini koordinasiya etməyəcəyi ilə bağlı bəyanatına görə tənqid edib və ötən cümə günü Almaniya hökumətinin başçısı Olaf Şoltsla Vladimir Putin arasında telefon danışığını bəyənmədiyini bildirib.

“Almaniya, alman mətbuatının qeyd etdiyi kimi, yəqin ki, enerji müqavilələrinə qayıtmaq və yenidən Rusiyadan enerji resursları ala bilmək üçün Rusiya ilə hansısa razılaşma əldə etmək imkanlarını axtarır”, - deyə Polşa prezidenti vurğulayıb. 

O, bu addımı səhv adlandırıb: “Rusiya Ukraynaya vəhşicəsinə hücum edir və azad dünyanın liderlərindən biri, Qərbin liderlərindən biri, böyük Avropa ölkəsi, Avropanın ən güclü iqtisadiyyatı işğalçı ilə danışıqlar aparır. Mən tamamilə əminəm ki, bu, beynəlxalq siyasi cəbhədə səhv idi”.

Polşanın baş naziri Donald Tusk da alman kanslerini tənqid edərək, “heç kim telefon zəngləri ilə Putini dayandırmayacaq” deyib.

Xatırladaq ki, özünə haqq qazandırmağa çalışan Olaf Şolts bildirib ki, onun Putinlə son söhbətində Rusiya prezidentinin Ukraynaya qarşı müharibə ilə bağlı fikirlərində dəyişiklik əlamətləri aşkarlanmayıb: “Söhbət çox təfərrüatlı idi, lakin bu, Rusiya prezidentinin müharibə ilə bağlı fikirlərinin az dəyişdiyini başa düşməyə kömək etdi və bu yaxşı xəbər deyil”.

Xatirə SADİQ