Tovuzda avrokubok planı, Əliyardan da danışdı – Berdiyevdən AÇIQLAMA
Misli Premyer Liqasının 27-ci turundan sonra “Turan Tovuz”un baş məşqçisi Kurban Berdiyev həm hakim mövzusu, həm də komandanın avrokubok perspektivi ilə bağlı sualları cavablandırıb.
Təcrübəli mütəxəssisə oyuna Əliyar Ağayev təyin olunsaydı, buna münasibətinin necə olacağı soruşulub.
Berdiyev məsələni böyütmədən, qısa və neytral cavab verib. O bildirib ki, istənilən halda komanda meydana çıxmalı idi:
“Nə etmək olar? Oynamaq lazımdır. Amma hakimlərdən heç kimi tanımıram”.
Baş məşqçinin bu fikirləri onun hakim təyinatları ətrafında polemikaya girmək istəmədiyini göstərib.
Berdiyev eyni zamanda “Turan Tovuz”un avrokuboklara mümkün vəsiqə şansını da dəyərləndirib. O, bu barədə danışmaq üçün hələ tez olduğunu vurğulayıb və hər şeyin heyətin gücləndirilməsindən asılı olduğunu qeyd edib:
“İndidən fikir bildirmək çətindir. Heyətin möhkəmlənməsindən və kimlərlə möhkəmlənəcəyindən asılıdır. Hələ gedib ora çatmamışıq”.
Bununla belə, komanda avrokuboklara vəsiqə qazansa, ev oyunlarını Tovuzda keçirmək istədiklərini də əlavə edib:
“Tovuz bizim şəhərimizdir, bura bizim meydançamızdır. İstəyərdik”.
Aytən
SAVASHMEDİA.az
