“Tramp Putinə uduzmaq istəmədiyindən Ukraynanı dəstəkləyəcək” – Zelenski
“Donald Tramp prezident seçkilərində qalib gəlsə, Vladimir Putinə uduzmaq istəmədiyi üçün Ukraynanı dəstəkləməyə davam edəcək”.
SAVASHMEDİA.az xəbər verir ki, Ukrayna prezidenti Volodimir Zelenski Reykyavikdə keçirilən Ukrayna-Şimali Avropa sammitinin brifinqində buna ümid etdiyini bildirib.
Trampın seçkidə qalib gələcəyi təqdirdə ABŞ-nin dəstəyini itirmə riski barədə suala Zelenski belə cavab verib: “Tramp çox danışır, amma onun Ukraynaya dəstəyi azaldacağını dediyini eşitməmişəm”.
O, əmin edib ki, Ukrayna bütün riskləri dərk edir. Bunlardan ən böyüyü ABŞ siyasətində dəyişikliyin olmasıdır. Lakin gələcək prezidentin şəxsiyyətinə baxmayaraq, o, Konqresin ikipartiyalı dəstəyini saxlamasını nəzərə alır.
“Hesab edirəm ki, Ukraynanı dəstəkləməmək Putin üçün böyük qələbə, Qərb, demokratiya və azadlıq üçün məğlubiyyət olacaq”, - deyə Zelenski əlavə edib.
Qeyd edək ki, Tramp son həftələr Ukraynanın dəstəklənməsi ilə bağlı ziddiyyətli fikirlər səsləndirib.
Xatirə SADİQ
