İslamabad danışıqları buna görə alınmayıb - Qalibaf səbəbi AÇIQLADI
İran və ABŞ arasında gərginliyi azaltmaq üçün keçirilən danışıqlar növbəti dəfə konkret nəticə verməyib.
İran nümayəndə heyətinin rəhbəri, parlamentin spikeri Məhəmməd Baqer Qalibaf bildirib ki, İslamabadda keçirilən uzunmüddətli müzakirələr zamanı Tehran konkret və perspektivli təkliflərlə çıxış edib. Lakin onun sözlərinə görə, qarşı tərəfin mövqeyi bu təşəbbüslərin reallaşmasına imkan verməyib.
Qalibaf vurğulayıb ki, danışıqlar masasında irəli sürülən ideyalar sülh prosesinə real töhfə verə biləcək səviyyədə olub. Buna baxmayaraq, ABŞ nümayəndə heyəti İranın etimadını qazanmaq üçün yetərli addımlar atmayıb.
20 saatdan çox davam edən İslamabad görüşləri xüsusilə iki əsas məsələdə – İranın nüvə proqramı və Hürmüz boğazı üzərində nəzarət mövzusunda ciddi fikir ayrılıqları ilə yadda qalıb. Bu səbəbdən tərəflər arasında tam razılaşma əldə olunmadan proses yekunlaşıb.
Mövcud vəziyyət göstərir ki, tərəflər arasında əsas problem texniki deyil, siyasi etimadsızlıqdır. İran daha çox regional və iqtisadi təsir imkanlarını qorumağa çalışdığı halda, ABŞ təhlükəsizlik və nüvə məhdudiyyətlərini prioritet sayır. Bu isə yaxın perspektivdə razılaşma ehtimalını xeyli zəiflədir.
Əgər tərəflərdən biri mövqeyində ciddi yumşalma etməzsə, İslamabad danışıqları kimi görüşlər yalnız vaxt qazandıran, lakin nəticə verməyən diplomatik proses olaraq qalacaq.
Oğuz
SAVASHMEDİA.az
