“Vens haqlıdır, cəmi bir neçə kilometr qalıb” – Peskovdan müəmmalı açıqlama

Rəsmi Moskva ilk dəfə olaraq döyüşlərin miqyasını “cəmi bir neçə kilometr” ifadəsi ilə təsvir edib. Bu isə həm cəbhədə real vəziyyət, həm də diplomatik proseslərin istiqaməti ilə bağlı ciddi suallar doğurur.

Rusiya Prezidentinin mətbuat katibi Dmitri Peskov ABŞ vitse-prezidenti Vensin sülh danışıqlarında tərəflərin kiçik torpaq sahələrinin müzakirəsinə fokuslandığı barədə fikirlərini şərh edərkən maraqlı bir məqamı etiraf edib: Vens haqlıdır, hazırda tərəflər arasında mübahisə geniş ərazilər üzərində deyil, məhdud, hətta “sayılı kilometrlər” səviyyəsindədir.

Onun sözlərinə görə, xüsusilə Donetsk istiqamətində vəziyyət elə bir mərhələyə çatıb ki, artıq söhbət inzibati sərhədlərə çatmaq üçün qalan son kilometrlərdən gedir. Peskov bunu belə ifadə edib: Donetsk istiqamətində təxminən 17–18 faiz ərazi üzərində nəzarətin tam təmin olunması üçün cəmi bir neçə kilometr qalır.

“Kiçik ərazi” – böyük siyasi məna

İlk baxışda bu açıqlama münaqişənin son fazaya yaxınlaşdığı görüntüsünü yarada bilər. Lakin məsələ təkcə coğrafi aspektlə məhdudlaşmır. “Bir neçə kilometr” ifadəsi əslində danışıqların mahiyyətini dəyişən bir siqnaldır.

Əgər tərəflər artıq böyük şəhərlər və regionlar yox, konkret koordinatlar üzərində müzakirələr aparırsa, bu, iki ehtimalı gücləndirir: ya müharibə hərbi baxımdan dalana dirənib, ya da diplomatik masa üzərində “mikro-sazişlər” dövrü başlayır

ABŞ-nin planı nədir?

ABŞ vitse-prezidenti tərəfindən səsləndirilən “kiçik torpaq sahələri” ilə bağlı fikir təsadüfi deyil. Bu, Vaşinqtonun müharibənin genişlənməsindən çox, mərhələli şəkildə “dondurulması” ssenarisinə yaxınlaşdığını göstərə bilər.

Belə olan halda, ortaya real sual ortaya çıxır: Bu “bir neçə kilometr” müharibəni bitirəcək, yoxsa yeni, uzunmüddətli qarşıdurmanın sərhədini müəyyən edəcək?

Xəritədə kiçik, siyasətdə böyük məsafə

Peskovun səsləndirdiyi rəqəmlər ilk baxışdan texniki təfərrüat kimi görünə bilər. Amma bu rəqəmlərin arxasında böyük geosiyasi qərarlar dayanır. Çünki tarix göstərir ki, bəzən xəritədə cəmi bir neçə kilometr olan fərq, siyasətdə illərlə davam edən qarşıdurmanın əsas səbəbinə çevrilir.

Hazırkı vəziyyət isə onu göstərir ki, Rusiya–Ukrayna müharibəsində həlledici mərhələ məhz bu “kiçik məsafələr” üzərindən formalaşır.

Səlcuq
SAVASHMEDİA.az