Azərbaycanlılar ən çox bu ölkəyə səfər edib - Xaricə gedənlərin çoxu kişilərdir

SAVASHMEDİA.az xəbər verir ki, Dövlət Statistika Komitəsinin məlumatına əsasən, 2026-cı ilin yanvar-sentyabr aylarında xarici ölkələrə gedən Azərbaycan vətəndaşlarının ümumi sayı 1 milyon 575,3 min nəfər təşkil edib.

Bu, ötən ilin eyni dövrü ilə müqayisədə 1,8 faiz azdır.

Ən çox Türkiyəyə gediblər

Hesabat dövründə xaricə səfər edən Azərbaycan vətəndaşlarının 44 faizi Türkiyəyə üz tutub. Bu ölkəyə gedənlərin sayı ötən ilin müvafiq dövrü ilə müqayisədə 2,3 faiz artıb.

İkinci yerdə Rusiya qərarlaşıb. Xaricə səfər edənlərin 14,6 faizi bu ölkəyə gedib. Rusiyaya səfərlərin sayı isə 2 faiz azalıb.

Gürcüstan üçüncü yerdədir. Azərbaycan vətəndaşlarının 13 faizi bu ölkəyə səfər edib. Ötən ilin eyni dövrü ilə müqayisədə Gürcüstana gedənlərin sayı 17,6 faiz artıb.

İrana səfərlər kəskin azalıb

Statistikada diqqətçəkən məqamlardan biri İrana səfərlərin azalmasıdır. Belə ki, 2026-cı ilin ilk doqquz ayında xaricə gedən Azərbaycan vətəndaşlarının 5,1 faizi İrana səfər edib.

Bu istiqamətdə səfərlərin sayı ötən ilin eyni dövrü ilə müqayisədə 44,5 faiz azalıb.

Digər ölkələrə səfərlərin payı isə 23,3 faiz təşkil edib. Bu istiqamətdə də əvvəlki ilin müvafiq dövrü ilə müqayisədə 2 faiz azalma qeydə alınıb.

Xaricə gedənlərin əksəriyyəti kişilərdir

Məlumata görə, hesabat dövründə xarici ölkələrə səfər edən Azərbaycan vətəndaşlarının 64,1 faizini kişilər, 35,9 faizini isə qadınlar təşkil edib.

Səfərlərin 70,4 faizi hava nəqliyyatı ilə həyata keçirilib. Vətəndaşların 27,6 faizi dəmir yolu və avtomobildən, 2 faizi isə dəniz nəqliyyatından istifadə edib.

Beləliklə, ümumi xarici səfərlərin sayında azalma olsa da, Türkiyə və Gürcüstan Azərbaycan vətəndaşlarının ən çox üz tutduğu istiqamətlər sırasında yer alıb. İrana səfərlərdəki 44,5 faizlik azalma isə hesabat dövrünün ən diqqətçəkən göstəricilərindən biridir.

Oğuz