ABŞ prezidentinin kürəkəni olub, üçüncü evliliyidir - Bakıda toyu olan 93 yaşlı bəy kimdir?

SAVASHMEDİA.az Roald Saqdeyevlə bağlı maraqlı məlumatları təqdim edir.

Roald Zinnuroviç Saqdeyev 26 dekabr 1932-ci ildə Moskvada tatar ailəsində doğulub. Atası Zinnur Zagiroviç Saqdeyev (1906-1994) partiya işçisi olub. 1950-1960-cı illərdə Tatarıstan MSSR Nazirlər Şurasının sədr müavini işləyib.

Anası Fəxriyyə Kərimovna Saqdeyeva riyaziyyat müəllimi olub. Roald Saqdeyev 4 yaşında ikən ailəsi Kazana köçüb. Kazanda orta məktəbi gümüş medalla bitirib. 1950-ci ildə Moskva Dövlət Universitetinə daxil olub. Fizika fakültəsində təhsil alıb. David Albertoviç Frank-Kamenetski və Lev Landaunun tələbəsi olub.

1961-ci ildən 1973-cü ilə qədər SSRİ Elmlər Akademiyasının Sibir Bölməsinin Nüvə Fizikası İnstitutunda plazma nəzəriyyəsi laboratoriyasına rəhbərlik edib. 1968-ci ildən SSRİ Elmlər Akademiyasının akademiki seçilib. 1973-cü ildən 1988-ci ilə qədər SSRİ Elmlər Akademiyasının Kosmik Tədqiqatlar İnstitutunun direktoru vəzifəsində çalışıb. O, bu vəzifəni ölkənin plazma fizikası üzrə aparıcı mütəxəssisi kimi tutub. Daha sonra İnstitutun Analitik Tədqiqatlar üzrə Elmi-Metodiki Mərkəzinin rəhbəri və baş elmi işçisi olub.

R. Saqdeyev Sovet İttifaqı Kommunist Partiyası Mərkəzi Komitəsinin Baş katibi M.Qorbaçovun kosmonavtika və hərbi kosmik sistemlər məsələləri üzrə müşaviri kimi çalışıb. Eləcə də onun Cenevrədə (1985), Vaşinqtonda (1987) və Moskvada (1988) ABŞ ilə ən yüksək səviyyəli danışıqlarda məsləhətçisi olub.

1986-cı ildə Sosialist Əməyi Qəhrəmanı mükafatı ilə təltif olunub. 1987–1989-cu illərdə SSRİ Ali Sovetinin deputatı, 1989–1991-ci illərdə isə SSRİ xalq deputatı olub. 1991-ci ildən Rusiya Elmlər Akademiyasının akademiki, fizika-riyaziyyat elmləri doktorudur.

1990-cı ildən ABŞ-də yaşayır.

O, ABŞ-nin Merilend Universitetinin Şərq-Qərb Mərkəzinin direktoru, NASA-nın eksperti, Nüvə Fəlakətinin Qarşısının Alınması üzrə Beynəlxalq Lüksemburq Forumunun Müşahidə Şurasının üzvüdür.

"Astronomik Jurnala Məktublar" jurnalının redaksiya heyətinin üzvü, VINITI informasiya nəşrlərinin Baş Redaksiya Heyətinin üzvü, "Quantum" kitabxanasının ("Elm" nəşriyyatı ) redaksiya heyətinin üzvüdür.

1987-ci ildən ABŞ Milli Elmlər Akademiyasının, 1990-cı ildən Amerika İncəsənət və Elmlər Akademiyasının, 1987-ci ildən İnkişaf etməkdə olan ölkələr Elmlər Akademiyasının (TWAS), İsveç Kral Elmlər Akademiyasının və Macarıstan Elmlər Akademiyasının xarici üzvüdür. 4 dekabr 1990-cı ildən Pontifik Elmlər Akademiyasının üzvüdür. Roald Saqdeyev plazma fizikası (şok dalğaları, nəql prosesləri, qeyri-sabitlik), idarə olunan termonüvə birləşmə problemi və kosmik fizika mövzularında elmi əsərlər yazıb.

Roald Saqdeyev 3 dəfə evlənib. O, ilk dəfə elmi rəhbəri David Albertoviç Frank-Kamenetskinin qızı Tema Davidovna Frank-Kamenetskaya ilə ailə qurub. Bu evlilikdən Saqdeyevin Anna və İqor adlı iki övladı var.

İkinci həyat yoldaşı, Syuzan Eyzenhauer (Syuzanın həmin vaxt 3 qızı var idi) ilə 1980-ci illərin sonunda ABŞ-də ezamiyyətdə olarkən tanış olub. Onlar 1990-ci ildə ailə qurub, 2007-ci ildə boşanıblar. Syuzan Eyzenhauer ABŞ Prezidenti Duayt Eyzenhauerin nəvəsidir. 

Üçüncü dəfə isə bu il Elena Popova ilə evlənib. Bakıda baş tutan toyu Əməkdar artist Elza Seidcahan idarə edib. Cütlük Amerikada yaşayır.

Banu