Bu dövlət qurumları işçi axtarır, 847 vakansiya - Maaşlar 1170 manatdan başlayır

SAVASHMEDİA.az xəbər verir ki, Dövlət İmtahan Mərkəzinin (DİM) məlumatına görə, vakansiyaların 12-si AB, 103-ü AC, 111-i BA, 621-i isə BB vəzifə qruplarına aiddir.

Vakansiyaların 86-sı 36 yerli icra hakimiyyəti orqanı, 306-sı 68 məhkəmə hakimiyyəti orqanı, 59-u isə Naxçıvan Muxtar Respublikasının 23 dövlət orqanı tərəfindən təqdim olunub. Ən çox vakant vəzifə isə Kənd Təsərrüfatı Nazirliyinə aiddir - 237 yer.

Maaşlar nə qədərdir?

Bu vakansiyalarla bağlı diqqətçəkən məqamlardan biri də dövlət qulluğunda yeni maaş sisteminin artıq qüvvədə olmasıdır.

Prezident İlham Əliyevin 19 mart 2026-cı il tarixli fərmanına əsasən, dövlət orqanlarında qulluq keçən şəxslər üçün inzibati vəzifələr üzrə aylıq vəzifə maaşının minimum məbləği 1170 manat müəyyən edilib. Yardımçı vəzifələr üzrə minimum məbləğ isə 760 manatdır.

Yeni maaş cədvəlində inzibati vəzifələr üzrə 35 ödəniş səviyyəsi və 7 ödəniş pilləsi müəyyənləşdirilib. Maaş vəzifənin səviyyəsindən və qulluq stajına uyğun pillədən asılı olaraq dəyişir.

Rəsmi maaş cədvəlinə görə inzibati vəzifələr üzrə məbləğlər 1170 manatdan 15 730 manatadək dəyişir. Məsələn, ən aşağı – 35-ci ödəniş səviyyəsində maaş pillədən asılı olaraq 1170-1345 manat, ən yüksək – 1-ci səviyyədə isə 13 680-15 730 manat təşkil edir.

Lakin bu rəqəmlər 847 vakansiyanın konkret maaş aralığı deyil. Hər bir vakant vəzifənin əməkhaqqı onun aid olduğu ödəniş səviyyəsi və pilləsinə əsasən müəyyən edilir.

Kimlər müraciət edə bilər?

Müsahibədə iştirak etmək üçün əsas şərtlərdən biri müvafiq vəzifə üzrə qüvvədə olan dövlət qulluğu sertifikatının olmasıdır.

Bundan başqa, vəzifənin tələb etdiyi təhsil istiqaməti üzrə elmlər doktoru elmi dərəcəsi olan şəxslər, eləcə də Nazirlər Kabinetinin müəyyən etdiyi dövlət orqanlarında vəzifələr üzrə azı 10 il iş stajına malik şəxslər də iştirak edə bilərlər.

Namizədlərin qeydiyyatı 15 sentyabr 2026-cı il saat 18:00-dək davam edəcək.

Beləliklə, hazırda dövlət qulluğuna qəbul üçün elan edilən 847 vakansiyanın konkret maaşlarını müəyyənləşdirmək üçün DİM-in vakansiya siyahısında hər bir vəzifənin ödəniş səviyyəsinə ayrıca baxmaq lazımdır.

Səlcuq