Balıq yağı yaddaşı gücləndirmir? - Yeni araşdırma
Balıq yağı əlavələrinin yaddaşı gücləndirdiyi və beyni qoruduğu ilə bağlı uzun illərdir geniş yayılmış fikir var. Lakin yeni araşdırma bu iddiaların düşündüyümüz qədər güclü sübutlarla dəstəklənmədiyini göstərib.
SAVASHMEDIA.az xəbər verir ki, ABŞ-də aparılan və eBioMedicine jurnalında dərc olunan araşdırmada 55-80 yaş arasında Alzheimer riski yüksək olan 365 nəfər iki il ərzində izlənilib. İştirakçıların bir qismi hər gün yüksək dozada DHA (omeqa-3 yağ turşusu) qəbul edib, digər qrup isə plasebo istifadə edib.
Araşdırmanın sonunda DHA-nın beyinə çatdığı təsdiqlənsə də, iştirakçıların yaddaşı, idrak qabiliyyəti və beyin həcminin azalması baxımından plasebo qrupu ilə müqayisədə əhəmiyyətli fərq aşkar edilməyib.
Alimlər bildirirlər ki, təkcə balıq yağı əlavələri Alzheimer xəstəliyinin qarşısını almaq və ya yaddaşı qorumaq üçün kifayət etmir. Onların fikrincə, beyin sağlamlığı üçün müntəzəm fiziki aktivlik, keyfiyyətli yuxu, qan təzyiqinə nəzarət, sosial aktivlik və Aralıq dənizi tipli qidalanma daha böyük rol oynayır.
Bununla yanaşı, mütəxəssislər balıq yağının tamamilə faydasız olduğunu demirlər. O, bəzi insanlarda trigliserid səviyyəsinin azaldılmasına və ürək-damar sağlamlığının dəstəklənməsinə kömək edə bilər. Lakin yeni araşdırma göstərir ki, yaddaşı gücləndirmək və Alzheimerdən qorunmaq məqsədilə yalnız balıq yağı əlavələrinə bel bağlamaq doğru yanaşma deyil.
Aytən
