Çin Xəzərin Azərbaycan sahillərində dənizin dibini “dinləyir” - Nə baş verir?

SAVASHMEDIA.az xəbər verir ki, bu barədə Çinin “Xinhua” agentliyi məlumat yayıb.

Məlumata görə, avqustun 18-də Bakı yaxınlığında Xəzərdə çalışan seysmik gəmidə Çin və Azərbaycan neft-qaz kəşfiyyatı mütəxəssisləri birlikdə Ocean Bottom Node (OBN) adlı xüsusi seysmik cihazları dənizin dibinə yerləşdiriblər. Daha sonra əldə olunan məlumatların təhlili aparılıb.

OBN sistemləri dəniz dibinə yerləşdirilərək yeraltı geoloji strukturlardan gələn seysmik siqnalları qeydə alır. Bu məlumatlar dənizin altındakı süxurların quruluşunu və mümkün neft-qaz yataqlarının yerləşməsini daha dəqiq müəyyənləşdirmək üçün istifadə olunur.

Əməliyyat Azərbaycan və Çin şirkətlərinin birgə müəssisəsi olan Caspian Geophysical Company tərəfindən həyata keçirilir. Xinhua-nın yaydığı görüntülərdə hər iki ölkənin mütəxəssislərinin cihazların quraşdırılması və məlumatların emalı prosesində birgə çalışdığı görünür.

Beləliklə, Xəzərin dibində aparılan iş yalnız geoloji məlumatların toplanması ilə məhdudlaşmır. Əldə ediləcək nəticələr Azərbaycanın dənizdə yeni neft-qaz perspektivlərinin qiymətləndirilməsi və gələcək kəşfiyyat layihələrinin planlaşdırılması baxımından əhəmiyyət daşıya bilər.

Çinin bu prosesdə iştirakı isə Bakı ilə Pekin arasında enerji sahəsində əməkdaşlığın yeni istiqamətlərindən biri kimi diqqət çəkir.

Qeyd edək ki, Azərbaycan və Çin son illərdə enerji və digər strateji sahələrdə əməkdaşlığı genişləndirir. Azərbaycan Prezidenti İlham Əliyev 2025-ci ilin aprelində Pekində “China Energy Engineering Corporation” şirkətinin rəhbəri ilə görüşündə Xəzərdə 1 giqavatlıq dəniz külək enerjisi layihəsi və digər enerji layihələri üzrə əməkdaşlığı müzakirə etmişdi.

Oğuz