Pelenin yanlış çıxan futbol proqnozları - Biri də düz çıxmayıb

SAVASHMEDİA.az xatırladır ki, futbol kralı özünün yanlış proqnozları ilə məşhur idi. Əslində “yanlış” ifadəsi burada çox yumşaq səslənir. Onun proqnozları tamamilə əksinə çıxırdı. 

Kral İlk məşhur proqnozunu 1994-cü ildə ABŞ-da keçirilən dünya çempionatında verdi. Onun fikrincə, Kolumbiya komandası çempion olacaqdı. Amma kolumbiyalılar o qədər də güclü olmayan qrupda (rəqibləri - ABŞ, İsveçrə, Rumıniya) sonuncu yeri tutdular və evə yollandılar.

Kral 1998-cı il çempionatında İspaniyanın favorit olduğunu söylədi. Bolqarıstan, Nigeriya və Paraqvayın yer aldığı qrupda İspaniyanın uğursuzluğa düçar olacağına inanmaq çətin idi. Amma ispanlar bunu “bacardılar”: cəmi 4 xal topladılar və qrupda 3-cü yeri tutaraq mübarizəni dayandırdılar.

2002-ci il çempionatı ilə bağlı Pele üç proqnoz verdi. Onlardan biri Braziliya, Kosta Rika və Türkiyə ilə eyni qrupda oynayan Çin komandasının növbəti mərhələyə çıxacağı idi. Çinlilər isə 3 oyunun üçündə də məğlub oldular, bir qol belə vurmayıb, doqquzunu buraxdılar.

Pelenin fikrincə, Braziliya həmin qrupdan çıxa bilməyəcəkdi. Amma Braziliya 3 qələbə ilə çıxdı və axırda çempion oldu. 

Üçüncü proqnoz finalda Argentina və Fransanın qarşılaşacağı idi. Argentina öz qrupunda üçüncü yeri tutdu. Fransa isə cəmi 1 xal topladı, heç qol vura bilməyib qrupda dördüncü yeri tutdu. Hər iki komanda mübarizəni dayandırdı. Argentina-Fransa finalı 20 il sonra baş tutdu. 

1991-ci ildə Qana komandası gənclər arasında dünya çempionu olduqda Pele 17 yaşlı qanalı Nii Lemptini “yeni Pele” elan etdi. Həmin Lempti 1997-1998-ci illərdə “Ankaragücü”də oynayırdı və karyerasını CAR çempionatında başa vurdu.

Yadigar Sadıqlı