Almaniya Ekvadora qəsdən uduzub? - "Satılmış oyun" iddialarını gücləndirən 4 detal

SAVASHMEDİA.az xatırladır ki, matçdan dərhal sonra sosial şəbəkələrdə oyunun nəticəsinin əvvəlcədən razılaşdırıldığı, matçın "satıldığı" barədə iddialar yayılmağa başlayıb.

Bu iddiaların yaranmasına səbəb olan əsas məqamlar isə aşağıdakılardır:

1. Almaniyanın bu oyunda qələbəyə ehtiyacı yox idi

Almaniya əvvəlki turda pley-offa vəsiqəni təmin etmişdi. Baş məşqçi Julian Naqelsmann əsas heyətdə bir neçə dəyişiklik etdi və bəzi aparıcı futbolçulara istirahət verdi. Ekvador isə mübarizəni davam etdirmək üçün mütləq qalib gəlməli idi. Bu motivasiya fərqi azarkeşlərin diqqətini çəkən ilk məqamlardan idi.

2. Oyunun gedişi qəfil dəyişdi

Almaniya hesabı erkən açmasına baxmayaraq, sonradan təşəbbüsü tamamilə əldən verdi. Ekvador ikinci hissədə daha üstün təsir bağışladı, ardıcıl hücumlar qurdu və iki qol vuraraq qələbəni əldə etdi. Almaniyanın xüsusilə ikinci hissədəki passiv oyunu sosial şəbəkələrdə çox müzakirə edildi.

3. Şübhəli hakim qərarları

Almaniyanın ilk qolundan əvvəl hücumun başlanğıcında Ekvador futbolçusuna qarşı qayda pozuntusunun olub-olmaması uzun müddət müzakirə edildi. Bundan əlavə, ikinci hissədə Almaniyanın xeyrinə təyin olunan penalti VAR-ın müdaxiləsindən sonra ləğv edildi. Bu epizodlar müxtəlif iddiaların ortaya çıxmasına səbəb oldu.

4. Mərc əmsalları niyə kəskin dəyişdi?

Bəzi sosial şəbəkə istifadəçiləri canlı mərc zamanı əmsalların kəskin dəyişdiyini yazaraq bunu şübhəli hesab etdilər. Lakin idman mərci üzrə mütəxəssislər bildirirlər ki, oyunun gedişində əmsalların dəyişməsi adi haldır və bu, təkbaşına danışılmış oyun anlamına gəlmir.

Bildirək ki, FIFA, turnirin təşkilat komitəsi, beynəlxalq mərc monitorinqi qurumları və ya hüquq-mühafizə orqanları Almaniya - Ekvador oyunu ilə bağlı hər hansı araşdırmanın başladığını açıqlamayıb. Nüfuzlu beynəlxalq KİV-lər də qarşılaşmanı sensasiya kimi qiymətləndirsələr də, oyunun "satıldığı" barədə heç bir sübut təqdim etməyiblər.

Səlcuq