Sizdə bu əlamətlər varsa, təcili həkim çağırın! – İnfarkt...

SAVASHMEDİA.az xəbər verir ki, miokard infarktı koronar ürək xəstəliyinin ən ciddi formasıdır, tez bir zamanda diaqnoz və müdaxilə tələb edir.

İnfarktın əsas səbəbləri

Ateroskleroz – arteriyalarda xolesterin və digər maddələrin toplanması, damarların daralması.
Koronar arteriya trombozu – damar içində qan laxtasının əmələ gəlməsi və damarı tam tıxaması.
Arteriya spazmı – nadir hallarda damarların qəfildən daralması.
Hipertoniya – yüksək qan təzyiqi arteriyalara ziyan vurur.
Diabet – damarların zədələnməsinə səbəb olur.
Siqaret çəkmə – damar sərtliyini və tromb riskini artırır.
Stress və hərəkətsiz həyat tərzi
Piylənmə və zərərli qidalanma

İnfarktın əsas simptomları

Sinə ağrısı (angina pektoris)

Ən tipik əlamətdir. Ağrı sıxıcı, yandırıcı xarakterli olur. Sol qola, çiyinə, boyuna, çənəyə, kürəyə yayıla bilər. Minimum 15-20 dəqiqə davam edir, istirahətlə keçmir. Bəzən "ürəyin üstündə fil oturub" kimi təsvir olunur.

Nəfəs darlığı

Xüsusilə fiziki fəaliyyət zamanı ortaya çıxır. Gecə saatlarında artan boğulma hissi ola bilər (ürək astması əlaməti kimi).

Soyuq tər və tərləmə

Ani və bol soyuq tərlə bədən stress reaksiyasına girir.

Ürəkbulanma və ya qusma

Daha çox qadınlarda rast gəlinir. Bəzən bu əlamətlər infarktı qida zəhərlənməsi ilə qarışdırmağa səbəb ola bilər.

Başgicəllənmə və ya huşun itməsi

Beyin qan dövranının pozulması nəticəsində baş verir.

Ürək döyüntüləri və ya aritmiya

Qeyri-normal ürək döyüntüsü hissidir. Taxikardiya (çox sürətli nəbz) və ya bradikardiya (çox yavaş nəbz).

Panika, ölüm qorxusu

Güclü psixoloji stress və ölüm hissi ola bilər.

Qadınlarda və yaşlılarda atipik əlamətlər

Qadınlar, yaşlılar və şəkərli diabet xəstələrində klasik sinə ağrısı olmaya bilər. Onlar zəiflik, yuxululuq, baş ağrısı, kürək və ya mədə nahiyəsində narahatlıq, qəfil halsızlıqdan şikayət edirlər.

Qeyd: Əgər sinə ağrısı 15 dəqiqədən çox davam edirsə, ağrı dincəldikdə keçmirsə, nəfəs darlığı və başgicəllənmə varsa, ağrı ilə birlikdə soyuq tər, ürəkbulanma varsa, mütləq təcili tibbi yardıma zəng edin.

Unutmayın ki, infarkt zamanı ilk 60 dəqiqə "qızıl saat" hesab olunur. Bu zaman ərzində tibbi yardım göstərilərsə, həyatın xilas olunması və ağır fəsadların qarşısının alınması mümkündür.

Banu